Sèl vrè Bondye a—Èske ou konnen Li?
Tout moun fè adorasyon. Gen moun ki adore yon bagay, gen moun ki adore yon lòt moun, gen moun ki adore yon imaj, e gen lòt moun ki adore tèt yo. Yo demontre devosyon yo pou dye yo nan plizyè fason. Pandan tout moun sa yo bay devosyon yo devan dye sa yo, yo toujou gen yon dezi ak yon anvi nan kè yo. Moun sa yo ka sèlman jwenn yon soulajman tanporè pou kri nanm yo ak yon ti ti kouraj pou fè fas ak demen. Sa fè yo tris lè yo wè fiti yo sanble menm jan ak jou pase yo. Dye y ap sèvi a pa kapab ranpli espas vid sa nan lavi yo.
Kiyès ou adore? Ki kote dye w la rete? Èske li vivan? Kisa li te fè pou ou jodiya? Èske ou te pale avèk li jodiya? Èske li te reponn kri kè ou? Nan kisa ou kwè?
Mwen vle ede ou fè konesans ak sèl vrè Bondye a ki te venk Satan, pi gran ènmi nou an. Li se Bondye kreyasyon an, ki te kreye tout bagay ak pawòl li. Labib va ede ou konprann Bondye sa ki nan syèl, ki te kreye lòm ak pousyè latè. Li premye ak dezyèm chapit nan Jenèz.
Li se Bondye etènèl la. Li pa gen kòmansman ni fen. Li se menm Bondye yè, jodiya, e pou toutan. Li se kreyatè, prezèvatè, e sipòtè tout bagay (Travay Apòt 17:22-34).
Tèks konplèt: Sèl vrè Bondye a—Èske ou konnen Li?
Gran Bondye sa ki demere nan syèl la enterese nan oumenm tou. Li wè ou nan mitan tout kantite pèp yo. Li renmen ou e li pran swen ou. Li vle vin plis pase zanmi ou sèlman. Li te voye Pitit li pou sove ou. Li vle demere ak ou, e plis ke sa, li vle demere andan ou. Li di, “Demere nan mwen, e mwen va demere nan ou” (Jan 15:4).
Si li pa rete nan kè ou, kiyès ki rete la? Lè nou gade toutotou nou, nou wè ke Satan ap domine e l ap detwi lavi anpil moun. Se limenm ki domine kè sa yo. Li bay ide pou tout mal yo tankou fè manti, vòle, move dezi, twonpe, fè revanj, ak egoyis. Si Satan rete nan kè ou e li tante ou pou kòmanse fè peche sa yo, poukisa ou pa ta vin jwenn vrè Bondye a ki te bay sèl Pitit li, Jezi Kri, pou mouri pou peche ou yo ak peche tout lemonn (Jan 3:16)?
Ou mande, “Kijan sa posib? Kijan yon moun ki si gran, toupwisan, e ki gen tout pouvwa kapab demere nan kè mwen?” Gade nan Ezayi 57:15.
Si ou fin fatige ak peche, poukisa ou pa priye Bondye epi repanti? Pa mwayen lafwa nan Bondye ak san Kris la, peche ou va padone e ou va resevwa yon nouvo nati. Lè Satan vin pou tante ou, ou va santi prezans Bondye toupwisan. Li va ba ou direksyon e li va anseye ou tout bagay (Jan14:26).
Nan Jan 10:10, Jezi pwomèt nou lavi ann abondans e li kapab ba ou lavi sa. Se va kado ou pou toutan ou rete fidèl e obeyi Li. “Si nou dakò pou nou fè sa mwen di nou fè, nou va manje bèl rekòt peyi a va bay” (Ezayi 1:19). Pa gen yon lòt dye ki gran konsa.