Yon Sovè pou ou
Èske ou se yon moun ki kontan? Laperèz ak kilpabilite peche kapab pran kontantman ou. Ou kapab mande tèt ou, "Kijan mwen ka kontan?"
Mwen gen bon nouvèl pou ou! Genyen yon moun ki kapab ede ou. Li ka padone peche ou yo epi l ap ba ou kè kontan ki dirab. Non li se Jezi. Kite m pale ou sou li.
Se Papa li, Bondye, ki te kreye lemonn. Li te kreye tout bagay nan lemonn. Li te kreye mwen menm avèk ou.
Bondye renmen nou. Li renmen tout moun nan lemonn. Bondye tèlman renmen nou, ke li te voye Jezi, sèl Pitit li a, sou latè. Lè Jezi te sou latè, li te geri malad yo e konsole moun ki te tris yo. Li te ouvri je avèg yo. Li te anseye moun yo anpil bagay.
Tèks konplèt: Yon Sovè pou ou
Jezi te vle nou konprann gran amou ke Papa li genyen pou ou ak mwen. Li te rakonte istwa sa ki esplike amou Papa li. Ou ka li istwa sa nan Labib, nan Lik 15:11-24.
Te gen yon nonm ki te gen de pitit gason. Li te panse ke tout bagay t ap mache byen. Yon jou, youn nan pitit gason yo te revòlte, li pwoche bò kote li, li di: "Mwen pa renmen kay sa, mwen vle al fè wout pa m e m ap kite isit la. Ban m pòsyon pa m nan eritaj la." Papa a te tris anpil, men li te ba li kòb la epi li kite l ale. Li te mande tèt li si li ta janm wè pitit gason li ankò.
Pitit gason an te ale byen lwen e pran plezi ak lajan li ansanm ak zanmi li yo. Li te gaspiye lajan li nan lavi egoyis. Li te panse li t ap pran plezi anpil, men sanzatann, lajan li te fini e zanmi li yo te kite li. Li te tou sèl e nan bezwen. Kounyeya kisa li dwe fè?
Li te ale jwenn yon kiltivatè ki te voye l bay kochon yo manje. Li pa t jwenn ase pou manje. Li te tèlman grangou, li santi li ta manje nan manje kochon yo. Li te kòmanse reflechi sou tout move bagay li te fè ak jan li te maltrete papa l. Li te vin pi mizerab.
Yon jou li te sonje jan papa l te renmen li ak jan li te byen nouri lè li te toujou lakay li. Menm domestik papa li yo te gen ase manje.
Li di nan tèt li: "Èske mwen ka tounen vin jwenn papa m apre tout sa mwen te fè l? Èske li va toujou renmen m? Mwen pa merite ankò pou yo rele m pitit gason li. Mwen ta dakò pou m sèlman yon sèvitè si l ap akeyi mwen."
Li leve imedyatman, li fè wout pou lakay papa l. Li ta pral wè si papa li ta padone l.
Papa a te nan lapenn pou pitit gason li depi li te ale. Li konn mande tèt li: "Èske l ap janm tounen?" Yon jou li wè yon moun ki t ap sòti byen lwen. Èske se te pitit gason l? Lè li wè li, li kouri al jwenn li ak bra louvri.
Pitit la di: "Papa, mwen peche kont ou. Mwen pa merite pou ou rele m pitit ou."
Men, papa li di: Pote pi bon rad pou li epi fè yon resepsyon. Pitit gason mwen an te pèdi, men mwen jwenn li ankò.
Nou tout tankou pitit gason sa; nou tout te pèdi lwen Bondye, Papa nou. Nou te gaspiye opòtinite ak anpil bon bagay li te ban nou. Nou te viv yon vi egoyis e nou te revòlte kont li. Jodiya Papa nou ki nan syèl ap envite nou vin jwenn Jezi. Li ap tann nou ak bra louvri.
Jezi te montre nou amou li lè l te bay lavi l kòm yon sakrifis pou peche nou yo ak peche lemonn antye. Moun te rejte li e li te soufri doulè lè li te kite mechan yo kloure l sou yon kwa. Grasa pouvwa Bondye, li leve sòti vivan nan lanmò epi l ap viv pou letènite.
Vin jwenn Jezi epi mande l pou padone peche ou yo. Lè li wè ou regrèt bagay mal yo ou te fè, li va padone ou epi lave tout peche ou yo ak san li ki te koule. Se pral yon bèl eksperyans! Ou pral vin yon moun nouvo. Lavi pral pran yon nouvo sans. Jezi pral ranplase kilpabilite e laperèz ou ak jwa e kontantman. Li va Sovè ou.